UFO

今仔日又閣看著新聞咧報講桃園一个cha-bó͘囡仔看著UFO,閣有kā伊錄--起來,不而過台灣UFO協會看著影片了後講即个影片若像是假--ê neh,閣講即chām仔in有收著bōe少UFO ê像片kap影片,毋過攏無啥物可信度,講著台灣ê電視台定定攏會請一kóa有ê無ê專家講外星儂閣有UFO,講kah誠譀,有ê儂相信,嘛有儂當做笑詼看看著好,但是若有儂來kā問我講敢會相信即號物件我會kā伊應講:我相信--neh

是按怎樣我會相信?因為我著是相信規个宇宙內(ú-tiū-lōe)無可能kan-na咱地球chiah有儂咧蹛,虛空(hu-khong) hiah大若有外星儂我感覺嘛真正常,閣再講我嘛是bat看著若親像是UFO ê物件--neh!!而且閣毋若我一个儂看著,hām我攏總有三个儂看--著,雖bóng即層代誌我嘛無啥愛對別儂講起,因為我想有濟濟儂會當做我是咧練痟話,若有趣味ê儂會使閣繼續看--落去,若感覺我是咧練痟話--ê隨時ē-tàng離開

舊年嘛bōe記得是tang時,橫直是三仔月進前,我閣佇馬祖東引(Tang-éng)做兵,東引彼个所在平素時天時若好暗時仔天頂是全天星,真正súi kah會驚死儂,kiám-chhái有儂會想講哭枵,是有影ia̍h無影?天頂全天星佇現代ê社會敢閣有tè通看?我共恁講現chhú時佇台灣hoān-sè真歹揣,尤其佇都市,但是東引真正是按呢,而且是規片--ê o͘h,我講ê話若無影馬英九出門隨予車挵,話講倒轉--來,彼个時陣我kap兩个鬥陣--ê暗時仔khang-khè做了坐咧歇睏ná看天星ná khà-hó͘-lān,即个時陣我著看--著佇天頂有一粒特別明顯ê毋kuh毋知是啥碗糕咧ia̍p-ia̍p-sih閣會振動,毋是chhoah屎星--o͘h,因為伊行真慢,閣烏白se̍h,liâm-mi行即爿liâm-mi行彼爿,bōe輸是桃花過渡--leh,我著趕緊叫邊仔彼兩个鬥陣--ê看he是啥碗糕,敢是UFO?有一个目睭毋知去予啥糊--著,直直kā伊比閣揣真久則看--著,我本來閣想beh叫其他儂來看,毋kuh我驚彼个若親像是UFO ê物件等咧著走無--去,著毋敢閣去叫別儂來--看,閣過無lōa久毋知伊是咧變啥báng雄雄走真緊,著真正按呢走無--去,揣攏無,哭枵,阮三ê阿兵哥suah 愣--去,這著是我舊年看--著káⁿ-ná是UFO ê代誌,做恁beh信ia̍h毋信,隨在恁,橫直我相信