切糕

即chām仔佇中國chhèng到掠bōe牢ê切糕事件到底是啥碗糕?切糕是一種新疆(Sin-kiong)ê特色小食佇中國通講逐位攏有咧賣,切糕ê材料有秫米,核桃,塗豆等等,用糖黏做一大塊,看儂客欲買偌濟現場切予伊,不而過儂講了錢生理無儂做,刣頭生理有儂做,hiâ-ê咧賣切糕ê新疆儂定定看著儂行倚來著請儂試食一粒核桃,知空ê儂bōe去食,若食落去代誌著大條--ah,in會開始推銷硬欲賣予汝,切落來ê切糕愛過磅,聽講切糕內面攏有灌水銀入去,會加真重,頭家烏白喊價共儂客當做phàn-á,著是欲拗秤尾,一塊無偌大喊4,50箍儂頭紙,若切落去著一定愛買,毋買著討皮疼,chiâ-ê賣切糕ê新疆儂即陣予儂號做切糕黨,前幾日佇湖南有儂客買切糕嫌傷貴kap頭家起衝突,無細膩共規車ê切糕lòng到反過,無偌久湖南某某公安局ê官方微博發表講事件造成兩个儂輕傷,切糕ê損失算算咧有16萬儂頭紙,中國網友看著了後感覺hàm-kōa-kōa,濟濟儂攏開始發表意見十喙九跤川,公安局官方微博liâm-mi共即篇文章刪除,隔轉工代誌bōe收山,網友佇微博繼續發表意見kap討論,新聞嘛開始咧報,短短兩工切糕事件著chhèng--起來,下面是中國網友佇網路頂寫ê一寡soan-siâu ê話,不止仔心適

1.對看ê條件kan-na一个,著是厝--nih愛有一車切糕

2.A:做我ê女朋友好無?B:呸!!汝看汝ê孝男面,體格閣bōe輸矮仔冬瓜,汝憑啥物來追求--我!!A:阿...彼咧..阮兜是賣切糕--ê  B:恁老師較好--ah,汝毋著較早講,若按呢....咱tang時欲結婚?

3. 有厝有車有切糕是現chhú時丈姆ê新標準

4.A:汝敢愛--我?  B:當然嘛愛--汝  A:按呢好,汝隨共厝賣掉,買一車切糕予我食

5.毋知恁是按怎欲共切糕黨抹烏,擦紅,畫黃,切糕我捌買,感覺hiâ-ê新疆儂閣不止仔好禮,問我欲買偌濟,我講三斤in著真正磅三斤,無共我拗秤尾,阮十外儂著一儂the̍h一塊切糕開始食,有兩个米九ê兄弟講閣bōe-pháiⁿ食,了後阮著共邊仔ê菜刀,鋸仔,抓耙仔,斧頭攑起來行轉去宿舍

6.一个sòng-hiong囡仔問一个好額儂講:汝是按怎chiah好額?好額儂應講:我細漢ê時嘛真散赤,kan-na有一粒蘋果niā-niā,我共彼粒蘋果擦kah真清氣賣予別儂,hiâ-ê錢ē-tàng予我買兩粒蘋果,囡仔閣問:我知--ah,閣再共彼兩粒蘋果擦清氣賣予別儂,著--無?好額儂講:當然嘛毋著,彼當時阮老父著開始教我做切糕