下暗豬哥閒(林建輝)主動來問我潘科元先生佇Google辦ê白話字文獻讀冊會是tang時開始,伊嘛想beh來鬥鬧熱一下,毋知讀冊會到底是啥款--ê,尾仔閣驚歹勢講因為大部分攏台灣儂,伊驚會kā咱攪擾毋敢來,我講猴毋chiah按呢,汝來逐个決定攏足歡迎,直直kā伊挐,伊閣躊躇誠久,結果嘛是來--ah,許嘉勇老師看著豬哥閒來不止歡喜,閣講久仰大名,真想beh kap伊交流,潘--先生對伊是呵咾kah會觸舌,逐个攏真歡喜,我即个外行--ê聽in咧討論嘛學著真濟物件,通過即个網頂讀冊會互相交流咱對閩台話嘛有閣較深ê了解,嘛證明講閩南話來到台灣chiah久互相交流嘛是無問題--ê
潘老師閣講豬哥閒ê腔口比我kap嘉勇老師閣較成台灣--ê XD,伊若來台灣絕對bōe予儂認出是福建儂,kā家己ê漳州腔暗khàm kah真好,哈~其實我感覺伊ê漳廈濫腔口已經講kah真慣勢--ah,雖bóng豬哥閒定定講伊無kā鄉音放bōe記--得,但是我kap伊平素時佇網頂語音開講,其他漳州朋友像東豬嘛定定講伊無漳州腔,伊逐擺攏欲證明講伊ê漳州話閣講了真輾轉,不而過講無幾句仔又閣開始咧講漳廈濫ê腔口XD,讀冊會結束了後潘科元老師佇面冊社團有寫一寡呵咾豬哥閒ê話,閣講伊ê歌聲死父讚,這是有影啦,我是定定咧聽,逐个攏真愛聽伊唱彼款sông-sông-sông--ê,伊比我即个台灣囡仔捌閣較濟台語歌,真濟歌我攏是聽伊teh唱則知影,而且伊真有才情閣會曉家己寫歌詞,即箍豬哥閒誠實無簡單,後擺我考慮kā痟婆仔(徐楓),小農婦(郭美麗)即兩个泉州儂叫來咱讀冊會,按呢決定會閣較趣味,因為痟婆仔會曉唱南管,通過交流討論相信逐个對正港ê福建泉州腔嘛會有進一步ê了解,讚--啦
No comments:
Post a Comment